Strategia da sviluppar la regiun (ssr)

La Regiun Surselva ei ina corporaziun dil dretg cantunal public. Ella includa il territori dil Reinanteriur denter Laax e la tgina dil Rein al Péz Badus e las vals lateralas Lumnezia, Stussavgia, Medel/Lucmagn, Val S. Pieder e Val Sumvitg. La strategia da sviluppar la regiun (ssr) ei in instrument directiv strategic dalla Regiun Surselva e da siu post da svilup sco era in muossavia per las vischnauncas. Per acturas ed acturs privats seporscha ella sto petga d'orientaziun ed en quei senn sedrezza ella ad interpresas ed associaziuns economicas, habitontas e habitonts, uniuns, organisaziuns sco era ulteriuras gruppas d'interess dalla regiun. En sia incarica concreta definescha la ssr finamiras e mesiras che la Surselva vul contonscher communablamein cun schi biars partenaris e partenarias sco pusseivel. La strategia resorta d'ina procedura d'anflar la strategia ch'ei sesviluppada d'in process da plirs pass ensemen cullas vischnauncas e la populaziun. La procedura ha inclus differents camps d'acziun ch'ein da muntada centrala per la Surselva per contonscher las finamiras da svilup.

GIDAR DA FORMAR GL'AVEGNIR DALLA SURSELVA

Co vulein nus viver e luvrar egl avegnir en Surselva?
Co sa la regiun daventar aunc pli attractiva per indigens, indigens secundars e turists?
Co duei la Surselva sesviluppar per che la populaziun sesenti era egl avegnir da casa?

Cun Vossa opiniun saveis Vus gidar da formar il svilup dalla Surselva. Contactei il post da svilup regiunal (celine@surselva.ch)

Bugen informein nus Vus regularmein dils process currents ed actuals sco era dils resultats intermediars. Cun nies newsletter digl avegnir essas Vus informai cuntinuadamein.

S'annunziar e seregistrar ussa pil newsletter SURSELVAvegnir