Pupi e Cartun

Versiun dils 24 da zercladur 2004, valeivel naven digl 1. da settember 2004

Per utilisar ils rumians a moda favoreivla pigl ambient e per levgiar il recicladi regiunal promova la regiun surselva acziuns da rimnar pupi e cartun veder a norma dallas suandontas disposiziuns:

• Il dretg sin contribuziuns dalla regiun surselva han instituziuns sco scolas, uniuns e vischnauncas ch'organiseschan rimnadas ellas vischnauncas associadas alla utilisaziun da rumians dalla regiun surselva.
• Per saver far valer las contribuziuns dalla regiun surselva sto il pupi/cartun che vegn rimnaus dallas instituziuns cun dretg sin ina indemnisaziun vegnir furnius al stabiliment per recicladi Surselva a Plaun Grond.
• Il transport dil pupi/cartun tochen al Plaun Grond va sin donn e cuost dil furnitur.
• Il pupi/cartun che vegn furnius ord acziuns da rimnada a Plaun Grond vegn pesaus sigl areal da Plaun Grond e la regiun surselva paga allas instituziuns cun dretg d'ina indemnisaziun in prezi fix da 11 raps il kilogram pupi/cartun. Tals che han negin dretg d'ina indemnisaziun san furnir gratuitamein pupi/cartun a Plaun Grond.
  La regiun surselva paga per pupi/cartun che vegn rimnaus en vischnauncas ch'ein denter 10 e 20 kilometers naven da Plaun Grond ultra dil prezi fix ina indemnisaziun vid ils cuosts da transport da 3 raps il kilogram pupi/cartun. La bunificaziun pils cuosts da transport per instituziuns cun dretg d'indemnisaziun en vischnauncas pli lunsch naven che 20 kilometers da Plaun Grond munta a 5 raps il kilogram pupi/cartun. Per eruir la distanza ei la tabella dalla regiun surselva decisiva.
• Sch'ins sto supponer ch'ei seigi vegniu empruau da retrer contribuziuns a moda abusiva, san ils pertucconts vegnir sclaus per adina ni per in cert temps da retrer contribuziuns. Encunter las disposiziuns dil secretariat regiunal dalla regiun surselva sa vegnir fatg protesta a scret e cun mussaments enteifer 10 dis tier la suprastonza dalla regiun surselva.

Quei conclus va en vigur igl 1. da settember 2004.